عيد الأم

النهاردة الأحد ١٤ مايو ٢٠١٧ هو عيد الأم في اليابان. عيد الأم في اليابان مش مربوط تاريخ معين زي ما بنحتفل بيه في الدول العربية ولكنه مربوط بيوم معين وهو ثاني يوم أحد من شهر مايو من كل عام

لاحظت فروق كتيرة بين عيد الأم هنا مقارنة بمصر . فبغض النظر عن اختلاف اليوم -في مصر الاحتفال بيكون في يوم ٢١ مارس-  كمان اليوم ده بيكون مش بس لتكريم الأمهات في مصر لأ كمان لتكريم كل من هي في مرتبة الأم  حتى لو ماكانتش متزوجة آو متزوجة ولكن بلا أطفال في بعض الأحيان. فمثلًا المُدرسة في مصر آم ،الدادا (المربية) آم ، الأخت الكبيرة اللي ربت أخواتها الصغيرين أم والفنانة المشهورة المحبوبة ولكن مااترزقتش بالأطفال برضه أم في مصر ولكن هنا في اليابان مافيش الثقافة دي وبالعكس حتى لو اتوجدت يمكن تخلق باب للجدال لأن فيه أراء حول موضوع المرأة وإذا كانت فعلًا مجبرة للتخلي عن شغلها للتفرع لتربية الأطفال والتحول لأم بدلًا من مرأة عاملة منتجة

اختلافات ثقافية بين مصر واليابان

كمان كنت دايمًا بفتكر عيد الأم في مصر بأغنية ست الحبايب من غناء فايزة أحمد ومسابقة الأم المثالية وازاي كنا لازم نهادي المُدرسات في المدرسة أحلى الهدايا ولكن بالرغم من أن اليابان واحدة من الدول اللي فيها الترابط الأسري لا زال له أهمية بنسبة كبيرة ماشفتش أي نوع من المسابقات دي ولا الهدايا دي هنا. بالعكس مبدأ اهداء المُدرس هنا هدية لأي سبب هو مبدأ مرفوض تمامًا وممكن يعتبر كنوع من الرشوة في بعض الأحيان

طب بيحتفلوا بعيد الأم في اليابان ازاي؟

مبدئيًا سبب الاحتفال بعيد الأم يوم الأحد هو لأنه العطلة الأسبوعية الرسمية مما يسمح بالتجمع الأسري والاحتفال. الهدايا المحبوبة هنا بصفة عامة هي الهدايا اللي مافيش اختلاف في الذوق أو الميول فيها بنسبة كبيرة زي الورد

 (وبالأخص زهرة القرنفل) وأدوات التجميل والماكياج،الكريمات ،الشامبو ومستلزمات العناية بالبشرة والعزومة على غذاء آو عشاء في فندق أو مطعم فاخر آو رحلة ليوم واحد لمدينة قريبة هي من أكثر الهدايا المحبوبة هنا

ايه اللي ماينفعش يتعمل في يوم عيد الأم؟

ماتخترش هدية على ذوقك بدون استشارة شخص مقرب أولًا

ماتختارش هدية بدون استشارة الموظف اللي في المحل أولًا وخصوصًا إذا كانت الهدية عبارة عن ورد لأن الورد ليه معاني وممكن الورد اللي تختاره يكون ليه معنى بيتعارض مع المناسبة دي

تجنب الهدايا الثقيلة والمادية زي الكوبايات والأطباق والتماثيل والتحف وكمان تجنب الهدايا اللي ليها علاقة بالمقاس زي النظارات والملابس والأحذية

 تجنب الهدايا المبتذلة زي إذا حبيت تجيب شنطة أو ساعة فالأفضل أن تكون من ماركة معروفة وإذا كان مشروب (زي الخمور) آو مأكولات أو زيارة لمطعم فالأفضل أن يكون بجودة معقولة وإلا ممكن تسيب انطباع سلبي

حاول أن يكون فيه توفيق بين الهدية واللي هيستلمها من ناحية السن والذوق والهواية والحساسية أو الأمراض اللي ممكن تكون عند المستلم يعني حاول تتجنب الساعات والاكسسوارات في حالة أن الطرف الآخر بيعاني من حساسية المعادن، وتجنب الحلويات إذا كانت المستلمة بتعاني من مرض السكر وهكذا

وكل سنة وجميع الأمهات بخير